La mancanza da medicaments s’intensivescha er en la medischina veterinara. Blers medicaments na stettian actualmain betg a disposiziun ed i vegnian adina dapli vitiers, ha ditg Patrizia Andina-Pfister da la Societad svizra da las veterinarias ed ils veterinaris ditg envers SRF.
Uschè nausch sco uss n'èsi anc mai stà.
Concret manchian per exempel infusiuns da calzium, in medicament che cunzunt vatgas da latg dovran magari suenter far vadè. Manca il medicament possia la vatga crappar. Er vaccins manchian. Per exempel ston ins tut tenor vaccinar chauns u chavals avant ir en l'exteriur. Da chattar products da substituziun saja difficil perquai che l'import da l'exteriur saja restrenschì, ha Patrizia Andina-Pfister da la societad svizra da veterinarias e veterinaris agiuntà.
La situaziun en Grischun n'è anc betg precara, ma nus sentin las stretgas da furniziun e stuain adina puspè duvrar auters medicaments.
Malgrà las stretgas da medicaments haja quai enfin uss adina funcziunà da chattar ina schliaziun. U ch'i dettia ina alternativa medicinala u ch'ins haja pudì sa gidar tranter las praticas, sco Johanna Ambühl, co-presidenta da la secziun grischuna da la societad da veterinarias e veterinarias ha ditg sin dumonda. Sche la situaziun s'accentueschia però possia quai avair duas consequenzas: Tut tenor na saja lura betg pli pussibel da garantir la sanadad da l'animal, uschia che quel stuess vegnir durmentà. Tar animals da niz muntass gliez er ina perdita economica.
Raschuns sumegliantas a medischina umana
La raschun da la mancanza saja sumeglianta a quella da la medischina umana: I vegnia producì memia paucas substanza activas e per part sajan las chadainas da furniziun bloccadas.
