Pervi da la bova èn la Val Calanca e 350 persunas stadas isoladas dal mund exteriur. Las lavurs da rumida sajan idas bain vinavant, uschia che la via saja puspè charrabla, ha Sven Fehler da l'uffizi chantunal da construcziun bassa ditg sin dumonda da l'agentura da novitads Keystone-SDA la dumengia suentermezdi.
Tenor las stimas da las autoritads èn var 300 meters cubics crappa e material ruts giu. Probablamain pervi da la ferma plievgia.
Plievgia e naiv
Cun la plievgia da venderdi ha Meteo Svizra er avertì da privels da sbuvaditschs ed inundaziuns. Per il Grischun Central, la Sutselva e la Surselva hai valì privel grond, stgalim 4. Er il cunfin da naiv è sa sbassà durant la notg.
Spezialmain blera plievgia hai dà en il Tessin cun fin 300 mm. Er en la Val dal Rain Songagliaisa hai dà ferma plievgia. Donns pli gronds u inundaziuns n'hai sco ch'i para dentant betg dà.
Schwanden puspè pertutgà
Er a Schwanden, il lieu en Glaruna ch'è stà pertutgà da grondas malauras, hai dà sbuvaditschs. Per Schwanden vala venderdi enfin dumengia in privel augmentà. Tschertas zonas èn bloccadas per la populaziun.
