La Confederaziun quinta che l’atun portia dapli infecziuns cun il coronavirus. La situaziun saja dentant differenta cumpareglià cun ils dus envierns da pandemia passads. Actualmain hajan passa 97% da la populaziun anticorpuls cunter il coronavirus. Tar persunas senza facturs da ristg è il ristg da vegnir ferm malsaun perquai pitschen l’atun proxim.
Recumandaziuns tenor ristg
En il center da las recumandaziuns è perquai da proteger persunas zunt periclitadas da vegnir grev malsaunas. Quai è glieud sur 65 onns, persunas tranter 16 e 64 onns cun malsognas preexistentas e dunnas en speranza. In booster saja en emprima lingia recumandà a questas gruppas da persunas, ha infurmà a Berna il president da la Cumissiun federala da vaccinaziun Christoph Berger.
La recumandaziun vala en segunda lingia per persunas tranter 16 e 64 onns che han contact cun gruppas da ristg, quellas duajan ponderar da laschar far il booster. Ina recumandaziun generala dat la Confederaziun era per persunas sur 16 onns e senza facturs da ristg. Per quellas fa ina segunda vaccinaziun da rinfrestgament senn, sch’ellas vulan minimar il ristg d’ina infecziun u d’in rar grev andament da la malsogna.
Las novas vaccinaziuns duain succeder il pli baud quatter mais suenter il davos tractament u guariziun. Tut las vaccinaziuns che correspundan a las recumandaziuns èn gratuitas. Questas recumandaziuns van en vigur ils 10 d’october 2022.
Ils certificats restan
Sco Linda Nartey dal BAG ha ditg, pon ins vinavant avair certificats per vaccinaziuns, per cumprovar in’infecziun u per resultats da test negativs. En Svizra n’è il certificat dentant betg en funcziun il mument. Per ir en l’exteriur ston viagiaturs e viagiaturas sclerir sez, tge cundiziuns per entrar che valan tut tenor pajais.
