Suenter las grondas stentas durant la crisa stoppian lavureras e lavurers far part dal progress da la conjunctura, argumentescha l’Uniun sindicala svizra sia pretensiun. Suenter che las pajas hajan stagnà dapi onns, saja uss temp da midar quai.
Pajas bassas e professiuns tipicas per dunnas
Damai ch'i vegn quintà durant la segunda mesadad dal 2021 ed en il 2022 cun in augment, datti en bleras branschas spazi per dapli paja. Quai pertutgia sur tut las branschas da construcziun, l'industria da cumplettaziun ed il commerzi en detagl.
Fitg grond saja il basegn plinavant tar las pajas las pli bassas. Ils ultims onns èn las pajas minimalas en ils contracts collectivs creschids pli pauc che las pajas medias. Per che la protecziun da dumping da paja restia activ, stoppian las pajas minimalas vegnir auzadas sin almain 4'000 francs il mais.
En professiuns qualifitgadas na tanscha la paja betg pli per egualisar las unfrendas ch'ins porta en il mintgadi. Per persunas senza qualificaziun giascha la paja er cun in pensum da 100%, datiers dal minimum d'existenza.
Plinavant stoppian las professiuns nua che sur tut dunnas lavuran, vegnir valurisadas pli ferm. Quai valia sur tut per la branscha da sanadad, nua ch'il nivel da pajas è fitg bass.