L’onn 2022 han 24% da la populaziun sur 15 onns fimà en Svizra. Cun quai saja la cumpart da fimaders sa reducida per trais puncts procentuals dapi l’ultima enquista il 2017. Quai ha communitgà l’Uffizi federal da statistica. Umens fiman per regla anc adina dapli. La differenza a las dunnas sa reduceschia dentant.
La quota da persunas che fiman fitg bler – pia dapli che 20 cigarettas per di – saja sa reducida per la mesadad ils davos 30 onns. Novs products da tubac e cigarettas electronicas sajan cunzunt populars tar persunas giuvnas. Var 17% da las persunas tranter 15 e 24 onns consumeschan per exempel cigarettas electronicas, shisha ubain snus. La mesadad da quellas persunas fiman er anc.
Lia Pulmunara svizra quitads pervi da la glieud giuvna che fima: Var in quart da las persunas sur 15 onns ha consumà tubac il 2022. Tenor Claudia Künzli – ch'è, tranter auter, responsabla per la prevenziun – vai en il parlament memia plaun cun realisar l'iniziativa «Uffants senza tubac». Quella è vegnida acceptada il 2022:
Influenza da la scolaziun
Tge che sa mussa: Sch'ins fima u betg ha in adina pli ferm connex cun la furmaziun. Persunas ch'han be fatg la scola obligatorica fiman per regla pli savens che persunas cun diplom d'ina scol'auta. Quellas differenzas n'hajan avant 30 onns anc betg sa mussà uschè fermamain.
Adattà al tema
Avant 10 onns ha Gabi Grob da Samedan chalà da fimar. Per ella ha questa decisiun per gronda part gì avantatgs.