- Tar e-cigarettas ston ins bainprest pajar la taglia sin il tubac. Suenter il Cussegl dals chantuns ha er il Cussegl naziunal approvà la midada da la lescha dal tubac. La nova taglia per e-cigarettas vegnia dentant ad esser pli bassa che quella per normalas cigarettas. La raschun saja che e-cigarettas fetschian pli pauc donn, ha ditg il Cussegl federal.
- Il parlament è sa cunvegnì en tge direcziun che la politica agrara duai ir a partir dal 2022. Il Cussegl dals chantuns ha fatg pront la fatschenta per la votaziun finala. Finamiras dal clima na fixescha quella però betg per l'agricultura. Da princip stat la fatschenta gia dapi la sessiun da primavaira. Il mars aveva il Cussegl naziunal tractà quella e latiers per gronda part suandà a las decisiuns dal Cussegl dals chantuns. Cun la fatschenta ch'è entant vegnida approvada èn ils dus cussegls tranter auter sa cunvegnids sin las contribuziuns da la Confederaziun per segirar las raccoltas e per ina meglra protecziun soziala.
- Il parlament vul suenter l'offensiva solara uss er ina offensiva da vent. Uschia duain projects da parcs da vent pudair vegnir realisads usché svelt sco pussaivel. Il Cussegl naziunal ha liquidà las ultimas differenzas en il sboz da la lescha. Resistenza da principi hai be dà da la PPS. L'express da vent na saja betg serius ed en intgins chantuns n'haja il pievel uschia nagut pli da dir tar projects da vent, uschia il tenor. Las ulteriuras fracziuns vesan quai però auter. Surtut durant ils mais d'enviern possia l'energia da vent contribuir in'impurtanta part tar il provediment d'energia.
audio
Per tadlar: curt e cumpact
ord RTR Audio dals 06.06.2023.
laschar ir. Durada: 1 minuta 15 Secundas.
- La paja d'in schef u ina scheffa d'ina cassa da malsauns na duai betg vegnir limitada sin maximalmain 250'000 francs ad onn. Quai ha decis il Cussegl dals chantuns e cunquai refusà ina moziun da la cumissiun da sanadad dal Cussegl naziunal. Quella è cunquai giud maisa. Era il Cussegl federal e la cumissiun pre-deliberanta avevan refusà questa moziun. In dals arguments: autras assicuranzas socialas n'hajan era betg da questas limitas da paja. Anc pendent è in'iniziativa parlamentara cun il medem tema.
- Pervi da la mancanza da spezialistas e spezialists vul il parlamentschluccar la lescha davart persunas estras. Suenter ch'il Cussegl naziunal aveva approvà in project da lescha dal Cussegl federal è uss er la Chombra pitschna entrada en chaussa. Profitar duain persunas da pajais che n'appartegnan betg a l'UE u a l'EFTA, sch'ellas pon demussar in diplom svizzer sin in aut nivel da furmaziun. En mira aveva il Cussegl federal per exempel la branscha d'informatica, da la tecnica u da la medischina.
- Il parlament na vul betg colliar la vegliadetgna d'AVS cun l'aspectativa da vita. Suenter il Cussegl dals chantuns ha er il Cussegl naziunal renvià l'iniziativa da renta dals giuvens liberals. El vul dentant in frain da daivets per l'AVS sco cuntraproposta indirecta.
- La Confederaziun duai vinavant sustegnair projects da traffic en las aglomeraziuns. Il Cussegl naziunal ha perquai decidì ina constribuziun da passa 1,6 milliardas francs per programs da traffic. Profitar duain radund 32 projects en tut las parts dal pajais, tranter auter er la citad da Cuira. La chapitala grischuna duai survegnir maximalmain 39 milliuns francs. Mintgamai bun in terz dals daners duain vegnir impundids per il traffic public, il traffic d'autos sco er projects per il traffic da velo e peduns. Sco proxim decida il Cussegl dals chantuns.
- Tgi che zuppenta sia fatscha en lieus publics duai stuair pajar enfin 1'000 francs. Sco emprima chombra ha il Cussegl dals chantuns approvà la lescha federala davart il scumond da zuppentar la fatscha. Quest scumond vala tant per hooligans e demonstrants sco era per burkas e vels da l'entir corp. Il Cussegl naziunal ha anc da decider.
- Il Cussegl dals chantuns na vul anc adina betg ch'ins installeschia vitgs da containers per requirents d'asil sin terren da l'armada. Per la segunda giada ha el refusà da metter a disposiziun daners per quest intent. La cumissiun da finanzas dal Cussegl dals chantuns vuleva metter a disposiziun 66,5 milliuns francs, la mesadad da quai ch'il Cussegl federal ha dumandà. La fatschenta va enavos en il Cussegl naziunal ch'aveva approvà l'emna passada il credit da radund 133-milliuns francs.
