Suenter las colonnas da tschuncaisma èn las vias envers puspè libras. Igl ha dà colonnas da passa 22 kilometers davant il Gottard. En consequenza hai era dà lungas colonnas sin plirs trajects da l’A13 e sin la via principala tranter Zizers e Rehanau.
Sesais Vus en colonna ed avais in pau temp? Lura laschai sumegliar curt cun noss quiz da colonnas.
Prognosa per il Grischun
La fin d'emna è Tschuncaisma – era quest onn èsi puspè da quintar cun bler traffic e colonnas tant sin l’autostrada A13 direcziun sid sco er en la citad da Cuira. Cunzunt il venderdi tranter las tras e las sis duai il traffic cuntanscher in punct culminant, sco quai che Andreas Pöhl, manader dal management da traffic chantunal, ha ditg envers RTR. Il problem saja lura ch'il traffic da vacanzas che vegn nà da la Bassa e da la Germania frunta sin il traffic da lavur.
Il concept da traffic vegnia tenor Andreas Pöhl ad esser pli u main il medem sco l'emna passada d’Ascensiun. Quai dentant cun singulas adattaziuns: per exempel cun dosar il dumber d'autos che pon ir tras la citad da Cuira u tras ils vitgs per lung l'autostrada. Uschia possia vegnir evità, ch'i dettia colonnas gist en mintga vitg.
Guntgir sur il Pass dal Gottard betg pussaivel
Il Pass dal Gottard resta serrà sur Tschuncaisma perquai ch'igl haja anc adina blera naiv. Quai ha communitgà l’Uffizi federal da vias. Uschia n’èsi betg pussibel da nizzegiar questa ruta sco alternativa per il tunnel dal Gottard la fin d'emna prolungada.
