- La Banca naziunala svizra sbassa il tschains directiv per 0,25 puncts procentuals.
- Cunquai è il nov tschains directiv tar 1,5%.
I saja stà pussaivel da sbassar il tschains directiv perquai ch'i saja gartegià da cumbatter a moda effectiva l'inflaziun en il decurs dals davos dus onns e mez, ha declerà la Banca naziunala en ina communicaziun. La chareschia saja ussa dapi intgins mais puspè sut 2% e cunquai sin il nivel che la banca considereschia sco stabil. L'inflaziun vegnia, tenor novas prognosas, era a restar en quest sectur ils proxims onns.
Grond svilup dapi il 2022
Avant aveva la Banca naziunala svizra auzà il tschains directiv da -0,75% il zercaldur 2022 en be tschintg pass sin 1,75%. Suenter aveva ella lschà el senza midadas duas giadas en roda. Cunquai aveva la banca fatg fin cun l'èra da tschains negativs en Svizra – in'èra ch'aveva cuzzà onns.
Observar svilup futur e far adattaziuns
La Banca naziunal svizra vegnia però ad observar cun attenziun il svilup da l'inflaziun e sche necessari danovamain adattar sia politica monetara. Quai per pudair garantir era a vista mesauna stabilitad dals pretschs. La banca saja perquai vinavant pronta da daventar activa sin il martgà da devisas sche quai vegnia necessari.
Pir ier aveva l'institut d'emissiuns dals Stadis Unids da l'America – la FED – annunzià da betg midar ses tschains directiv.
