L'Uffizi da construcziun bassa saja en general cuntent cun las mesiras da reglar il traffic, ha Andreas Pöhl ditg al Schurnal regiunal da Radio SRF. Tenor il manader dal management da traffic hajan ins quella giada be dosà il traffic. Er en l'avegnir veglian ins sa tegnair vi da quella tactica.
Las mesiras ch'ins aveva testà avant – triascha e serrar vias – na sajan betg sa cumprovadas. La triascha, quai vul dir, tar mintga automobilist vegn controllà sch'el u ella dastga passar e quels ch'e n'èn betg indigens vegnan tramess enavos. Sco Andreas Pöhl constatescha, haja quai dà memia lungas discussiuns, uschia ch'i dat là lungas colonnas. Ultra da quai saja quai legalmain en ina zona grischa. Tenor l'ordinaziun federala da passagi na saja betg pussaivel da serrar vias regularmain.
La finamira a curta vista saja uss da cuntinuar a dosar il traffic. A vista mesauna – in fin dus onns – saja planisà dad automatisar quest process cun amplas e sensurs che dumbran il traffic. Uschia vegnia il traffic da guntgir vers sid dosà senza ch'i dettia colonnas aifer ils vitgs. Quai tranter Zizers e Trimmis, davant Domat, tar il vial da La Punt/Reichenau ed il sutpassadi da la Viafier Retica a Panaduz. Las positziuns sajan sa cumprovadas e vegnan circa mantegnidas.
Ch'igl ha questa giada tuttina dà in pau dapli traffic entaifer il vitg da Domat, haja da far cun in plazzal en il vitg. Oriundamain saja stà previs da reglar en omadus lieus il traffic, vul dir al cumenzament dal vitg per dosar il traffic da transit e lura entaifer il vitg tar il plazzal. Duas regulaziuns sa concurrenzeschian però ed ins haja decis da regular il traffic be tar il plazzal. Tras quai haja dà entaifer il vitg dapli traffic, uschia Andreas Pöhl.
Colonnas artifizialas per cugliunar navis
Er che l'effect sin ils navis, ch'i vegnia mussà colonnas avant ils vitgs, saja giavischà conferma Pöhl. I na saja dentant betg uschè effectiv sco giavischà – i giaja ditg fin ch'ils navis reageschian. Sco via da guntgida per il Gottard vegn l'A13 er betg pli numnada sch'il traffic stagnescha en Grischun. Ed a lunga vista saja la finamira per exempel da realisar quatter vials en il tunnel Islabella.
Tuts vulan ir vers sid tras il Gottard
Sur Tschuncaisma viagian blers en il sid da las alps. Tras quai spetga er bler traffic al Gottard. Viasuisse fa quint che las colonnas pli lungas cumenzan venderdi circa a las 11:00, e chalan pir sonda enturn las 22:00. Perquai recumonda Viasuisse da partir en direcziun sid u venderdi baud, u durant la notg. Per automobilists ed automobilistas da la Svizra da l'ost e la regiun da Turitg vegn er la ruta alternativa sur il San Bernardino en dumonda. Quella vegn cussegliada sch'ins sto spetgar sur in'ura davant il tunnel dal Gottard. Er il pass dal Son Gottard è avert.
Returnar
Il meglier saja da turnar tras il Gottard glindesdi saira u notg. Er glindesdi e mardi hai dà en ils davos onns colonnas da fin 8 km tranter las 11:00 e 23:00.
Ulteriurs trens a disposiziun
Las Viafiers federalas han 26 ulteriurs trens che charreschan en il sid per transportar dapli passagiers e passagieras.
Qua vai tar la situaziun actuala da las vias e dal traffic.