Co paja la Svizra?
Tenor in studi actual da la ZHAW e l'universitad da Son Gagl vegnan radund 31% da tut las transacziuns fatgas cun apparats mobils sco Twint u era «E-Wallets» sco Apple Pay u Google Pay. Tar tals «E-Wallets» vegn ina carta da debit u credit deponida digitalmain.
Las activitads che vegnan fatgas cun cartas da debit (betg mobilas) u cun daners bluts èn tar radund 24% – uschia pon ins pli u main discurrer d'in pari tranter las duas modas da pajament.
La lescha è clera
Tenor lescha federala è mintga persuna obligada d'acceptar daners bluts sco med da pajament. Perquai ch'i sa tracta qua dentant d'ina lescha dispositiva, dastgan las partidas pertutgadas era sviar quella. Ditg curt: sche l'affar plazzescha ina tavla bain vesibla ch'avertescha la clientella ch'i vegn be acceptà pajaments cun carta u digitals, fa questa modalità automaticamain part da la lescha.
Inclusiun è er in tema
Entant ch'il «pajar senza contact» daventa adina popular, na dastg'ins betg invlidar l'inclusiun finanziala. Philip Fischer – advocat cun spezialisaziun per dretg da banca – è s'exprimì a moda seguainta envers RTS:
I dat era persunas che n'han betg access als meds da pajar moderns. La pussibiltad da dastgar pajar cun daners bluts ha perquai er ina dimensiun soziala.