Thomas Zurbuchen - «Schliaziuns ch'i na dat betg – perquai che nagin n'ha empruvà»

Thomas Zurbuchen è creschì si a Heiligenschwendi, ina pitschna vischnanca en il chantun da Berna. Suenter è el ì al gimnasi a Thun, per Thomas Zurbuchen saja quest stà in grondischem pass – pli grond ch'il pass vi l’America.

Là era el alura il directur scientific da la NASA. Durant sis onns ha el manà var 10'000 persunas ed ha lavurà cun in budget da var otg milliardas dollars. Uss è l'astrofisicher enavos en Svizra e maina la partiziun Space a la ETH Turitg e dat vinavant ses savair ed era sia gronda fascinaziun per la scienza, per l'univers, per il tschiel e per las galaxias.

Lavur tar la NASA

In di da lavur tar la NASA era tar Thomas Zurbuchen plain e pli che plain cun sedutas. El ha ditg ch'i na saja betg perquai ch’el saja ina persuna tant impurtanta, mabain perquai che la NASA ha il budget ed ha bleras missiuns. El haja be pudì sa participar a radund 10% fin 15% da las sedutas ch'el fiss stà envidà.

Mo betg mo dumondas grondas ed impurtantas u decisiuns strategicas tutgan en in di dal directur scientific. Per insumma arrivar en la chasa stoppian ins passar ina controlla da segirezza. A l’entrada da la NASA stattan persunas cun armas. Sco emprim saja quai in tic starmentus, dentant ins emprendia d'enconuscher era questas persunas en unifurma. E suenter in temp ha il directur scientific alura pudì entrar davosvart, senza controlla.

Thomas Zurbuchen, u era numnà: Dr. Z

Uss è Thomas Zurbuchen enavos en Svizra e lavura a la ETH. Suenter 27 onns en ils Stadis Unids saja la Svizra per el ussa «mini». Tut sia carriera ha el fatg en l’America, era dentant era adina immigrant. Sco emprim n'eri betg mo simpel per el, il medem sentiment aveva el uss era cun returnar en Svizra.

Dals Stadis Unids e da la NASA manca ad el ses team. Thomas Zurbuchen di, che las collavuraturas e collavuraturs mancan mintga di ad el. Dapi l’avust 2023 lavura l'astrofisicher sco responsabel per la partiziun Space a la ETH Turitg.