L'idea da scursanir la quarantina per dus sin anc 5 dis per persunas ch'èn vegnidas en contact cun infectads vegn discutada vehementamain. L'epidemiolog Marcel Salathé vesa ussa schizunt ina pussaivladad d'en quest cas abolir daltut la quarantina.
Laiters stuessan las persunas da contact survegnir 10 tests sperts e far mintgadi in test, propona el en la «SonntagsZeitung». Tar in test negativ possian ins cun esser precaut er puspè ir a lavurar. Ina tscherta ristga existia. Quella saja però da responsar en vista a la mancanza da persunal che smanatscha sche la mesa Svizra stoppia seser a chasa pervia da suspect da corona, uschia Salathè. Las reglas da quarantina sajan savens cumplitgadas e dependian sch'ins ha survegnì il booster u quant lunsch enavos che l'ultima dosa u guariziun è.
Ulteriur expert vesa opziun d'abolir la quarantina
Er il professur per infecziologia a l'ospital universitar da Turitg, Huldrych Günthard vesa l'opziun d'abolir la quarantina sco pussaivel. Ussa saja però anc memia baud, perquai ch'i na saja anc betg cler avunda, sche l'andament cun Omicron è propi uschè miaivel. En duas u trais emnas possian ins discurrer d'avart l'aboliziun.
