La banca gronda UBS ha scrit en il terz quartal dal 2023 ina perdita da 785 milliuns dollars americans. Senza ils custs d'integraziun pervi da la surpigliada da la Credit Suisse, fiss quai stà in gudogn dad 844 milliuns, sco la banca ha communitgà mardi.
Tenor atgnas indicaziuns ha l'UBS gia stritgà radund 4'000 plazzas sin l'entir mund, e spargnà radund trais milliardas francs. Cumpareglià cun il dumber da persunal cumbinà d'omaduas bancas, haja l'UBS reducì il dumber per radund 13'000 plazzas. En tut datti 115'981 plazzas a temp cumplain en la nova banca gronda.
Igl è l'emprim quartal che l'UBS integrescha la Credit Suisse cumplainamain en sia bilantscha. En il segund quartal dal 2023 èn las cifras da la Credit Suisse mo vegnidas quintadas vitiers per il fanadur.
L'UBS ha fatg meglras cifras che quai ch'ella ha spetgà. Ella n'ha betg quintà ch'ella pudess far gudogn, sch'ins na resguarda betg ils custs da l'integraziun. En tut ha l'UBS pudì ramassar dapli daners en sia fatschenta da coc, l'administraziun da facultad. En il terz quartal ha ella anc ina giada acquirì 22 milliardas dollars, ed administrescha uschia 5'373 milliardas dollars.
