Sch’i dat in ferm terratrembel duai tgi che posseda ina chasa era pajar ina cumpart per cuvrir ils donns. Questa midada vul il Cussegl federal fixar en la constituziun. Sco proxim duai il Departement federal da finanzas elavurar ils detagls – decider stuess la fin finala il pievel svizzer a l'urna.
Concret duain tuttas proprietarias e proprietaris da chasas pajar ina contribuziun da maximalmain 0,7% da la summa da l’assicuranza d’edifizis. Uschia fissia pussaivel da cuvrir donns d'enfin 20 milliardas francs, scriva il Cussegl federal
Nagin obligatori
La dumonda sch'i duvrass in'assicuranza obligatorica cunter terratrembels ha occupà pliras giadas il Parlament federal. Bleras politicras e blers politichers èn dentant sceptics, cunquai ch'i dat blers models sin basa privata. La finala ha il parlament incumbensà il Cussegl federal d'elavurar princips per finanziar donns tar in terratrembel. Quai ha el uss fatg cun la proposta da cunfinanziaziun.
Grevs terratrembels datti bain darar en Svizra, il privel da gronds donns è tuttina grond. Actualmain n’èsi betg obligatoric d’avair in’assicuranza da donns da terratrembel. Circa 15% dals bajetgs èn assicurads.
