Uffants duain survegnir la schanza da laschar vaccinar cun almain duas dosas avant s'infectar cun il coronavirus. La circulaziun dal virus en scolas duai vegnir sminuida cun ventilar. In med bunmartgà per tegnair en egl quai, sajan moniturs da CO2.
Il testar regular almain ina giada l'emna pudess franar las chadainas d'infecziun. Uffants sur sis onns duain vegnir testads tar mintga sintom. Uffants sut sis onns duain betg vegnir mulestads sch'i n'è betg necessari. Di Gallo ha dentant er fatg cler che la qualitad d'aria sulet, na tanschia betg. Impurtant saja ina cumbinaziun da differentas mesiras da protecziun. Da purtar mascrinas en stanza da scola saja da cussegliar.
En general duessan uffants cun sintoms restar a chasa. Tar uffants pli giuvens, duai la decisiun da laschar vaccinar adina vegnir decidida a moda individuala, nua ch'i fa senn.
BAG quinta cun dapli ospitalisaziuns
Che las cifras d'ospitalisaziuns èn actualmain stabilas, malgrà ch'il dumber d'infecziuns s'augmenta fermamain, è tenor il BAG sulet in fenomen temporar. Las proximas emnas quintian ins cun dapli ospitalisaziuns. Quai ha declerà Patrick Mathys, il manader da la secziun da superaziun da la crisa. Ins na possia betg ignorar quai ch'ins vesia da l'exteriur. Lezza situaziun na saja betg empermettenta.
Il BAG ha publitgà ch'i haja dà entaifer 24 uras 20'742 cas novs. Il medem mument ha il BAG nudà 15 novs mortoris e 109 persunas èn vegnidas ospitalisadas.