La Svizra stoppia uss reducir il dumber e la grondezza d’occurrenzas. Quai valia er per occurrenzas privatas. Er tar la lavur duai dar damain inscunters tranter persunas, scrivan ils experts e las expertas. Plinavant appellescha la taskforce da reagir gia ad uras e betg pir cura ch’il dumber d’ospitalisaziuns e mortoris creschia puspè. Sch’il trend actual cuntinueschia stoppian ins numnadamain quintar anc durant l’october cun passa 2'000 infecziuns per di.
La finamira saja da proteger la sanadad dals umans ed il sistem da sanadad svizzer – cun uschè paucas restricziuns per la societad ed economia sco pussaivel. Quai reussieschia tenor la taskforce il meglier sche la cifra d'infectads vegnia tegnida bass cun mesiras sistematicas, che sajan pli pauc restrictivas e custaivlas.
En il Grischun hai dà 26 infecziuns novas cun il coronavirus las ultimas 24 uras. Actualimain sa chattan 756 persunas en quarantina e 116 en isolaziun. Il venderdi aveva il chantun annunzià 22 infecziuns nova, 742 persunas en quarantina e 97 en isolaziun.