- A travers sur la renumada Fora da S. Martin tar Elm en Glaruna è ida a val ina gronda bova.
- Nagin na para dad avair remartgà la bova da crappa a la cresta dal piz dal Grond Tschingelhorn, scriva l'uniun Patrimoni mundial Sardona.
- Tenor il Servetsch svizzer da terratrembels è la crudada capitada ils 3 d'october a las 9:46. Umans e l'infrastructura n'èn per fortuna betg stads pertutgads.
- Ins stoppia quintar cun ulteriuras crudadas il proxim temp e cunzunt la primavaira proxima.
Oravant tut las abitantas ed ils abitants da la vischnanca dad Elm hajan constatà che la muntogna vesia tuttenina ora in zic auter, ha declerà il geolog Thomas Buckingham a l'agentura da novitad Keystone-SDA. La dimensiun effectiva da la bova n'è anc betg registrada. Tenor Buckingham dastgass i dentant esser «segir dapli che 10'000 meters cubics» grip ch’èn crudads a val, tant da la vart glarunaisa sco era dal Grischun.
Ina raschun considerabla per la crudada dal grip al Grond Tschingelhorn è cumposiziun dal grip. Ils pizs gits da Las siat soras consistan or da crap da Verrucano. Gist questa crappa da Verrucano directamain sur la ruttadira inversa glarunaisa è enconuschenta per lur instabilitad.
La ruttadira inversa glarunaisa è la midada tar la rasada grischa da chaltschina che giascha sut en. La Fora da S. Martin perfora questa rasada da chaltschina sin mes’autezza.
Pussaivladad per ulteriuras crudadas
Pervia da la crudada da grip na saja la Fora da S. Martin betg pli cuntanschibla per alpinistas ed alpinists, ha Buckingham ditg vinavant. Ultra da quai vegnia scusseglià urgentamain da turas da raiver e da spassegiadas en ils conturns directs: Ils responsabels quintan cun ulteriuras crudadas.
Il sectur inclinà sur la Fora da S. Martin al Grond Tschingelhorn è enconuschent per sia gronda activitad da crudadas da crappa. Terratrembels en la regiun pudessan gidar a schluccar la crappa. Durant ils ultims dis n'ha il servetsch svizzer da terratrembels dentant registrà naginas stremblidas en ils conturns directs.
