Pèrs che vivan en concubinat survegnan ozendi mintgamai ina renta d’AVS cumplaina, sch’els vegnan pensiunads. Autra è la situaziun per pers maridads, quels survegnan ensemen maximalmain 1,5 rentas d’AVS.
Sut il stritg po quai muntar fin a 1’200 francs al mais, e tenor l’Allianza dal Center è quai malgist. Ella pretenda perquai cun si’iniziativa da betg pli scursanir la renta da pèrs maridads.
Laschar la schelta als pèrs maridads
La segunda iniziativa vul far fin cun il chasti da maridaglia. Uss vegnan la facultad sco era las entradas da pèrs maridads quintads ensemen, per la finala calcular la taglia che sto vegnir pajada.
Per da la progressiun pajan pèrs maridads uschia cleramain dapli taglia, sco sche las persunas vivessan ensemen senza maridar. L’iniziativa vul perquai surlaschar als pèrs maridads la decisiun, sch’els vulan ina taxaziun cuminaivla ubain ina a moda individuala.
Per rimnar las 100’000 suttascripziuns necessarias per mintgina da las duas iniziativas, ha l’Allianza dal Center uss temp fin la primavaira 2024.
