Tgi che posseda ina chasa ubain in’abitaziun na duai en avegnir betg pli stuair inditgar la valur da l'atgna locaziun sch'el emplenescha la decleraziun da taglia. Il medem duai era valair per abitaziuns secundaras che na vegnan betg dadas a fit. Quai vul il Cussegl naziunal. El ha approvà – cuntrari al Cussegl dals chantuns – ina midada cumpletta da sistem tar las taglias sin la proprietad d'abitar.
Mo PLD per status quo tar abitaziuns secundaras
La decisiun è crudada cun 158 cunter 31 vuschs e 3 abstenziuns. Be la PLD ha vuschà serradamain cunter. Ella vuleva seguir a la decisiun dal Cussegl dals chantuns e suttametter abitaziuns secundaras utilisadas sezzas a la taglia per la valur da l'atgna locaziun. Da vart grischuna han Anna Giacometti ed Magdalena Martullo vuscha per restar tar il status quo tar las abitaziuns secundaras.
Las ulteriuras fracziuns han però seguì a la cumissiun d'economia predeliberanta ed èn stadas per ina midada consequenta dal sistem inclus las segundas abitaziuns. Be uschè possian las autoritads fiscalas vegnir distgargiadas administrativamain ed evitar duplicitads, uschia il tenor. Sustegnì questa posiziun han era Jon Pult ed Sandra Locher Benguerel da la PS.
