Il project da taglia 17 duai far fin cun ils privilegis da taglia per interpresas da l’exteriur ed uschia impedir che la Svizra vegn sin ina glista naira ed è confruntada cun sancziuns e chastis d'auters pajais. Per che las interpresas na bandunian betg la Svizra duain tuttas interpresas pajar pli paucas taglias en Svizra.
Ditg hai vesi ora bain per quai project. Ussa, cura che la fatschenta vegn el Cussegl naziunal datti dentant adina dapli resistenza. Adrian Camartin, pertge è quai project uschè dispitaivels?
Adrian Camartin: I va per blers daners. Daners da taglia che van a perder. Uschia sco quai ch'il project da taglia è ussa sin maisa, custass el da quai da 2 milliardas francs, e quai mintg'onn. La stad ha il Cussegl dals chantuns decidì da cumbinar quella refurma cun la finanziaziun da l'AVS. Quai ina giada per augmentar l'acceptanza da l’entir project ella populaziun, mo era per avair a curta vista ina schliaziun per las difficultads finanzialas da l'AVS. Lezza refurma, che leva segirar la finanziaziun da l'ovra sociala, ha enconuschentamain fatg naufragi avant in onn.
Igl è pia d'ina vart la dumonda co las sperditas da taglia duain vegnir cumpensadas e da l'autra vart il pachet, la cumbinaziun da taglia sin interpresas ed AVS che procuran per dispita ella chombra gronda.
La PPS ha annunzià ch'ella vegni a far la proposta da renviar l'entir project al Cussegl federal. Tge na plascha betg ad els?
Els crititgeschan, ensemen cun la PBD, ils Verds ed ils Verd-liberals, gist quai pachet da dus temas che n’hajan atgnamain da far nagut in cun l'auter. Il Cussegl federal duai perquai anc ina giada ir davos ils cudeschs e preschentar uschè spert sco pussaivel in project nov. Mo questa fin d’emna han ins lura era pudì leger che divers exponents da la PPS fissan pronts per in cumpromiss, quai sch'ins prendess dapart il project e schess votar las Svizras ed ils Svizzers ina giada davart quella part che pertutga las taglias sin interpresas e da l'autra vart, separà, sur dal sustegn per l'AVS.
Davos il pachet stat la Partida socialdemocratica. Dentant, i dat era en sias retschas politichers che crititgeschan il project da taglia sco quai ch'el vegn ussa discutà el parlament. Tge è qua il chavel en la schuppa?
Quai ch'ins na dastga betg emblidar en quell'entira discussiun è ch'igl è la sanestra che ha fatg cupitgar il project precedent, la refurma da la taglia sin interpresas trais (USR3) . E differents exponents èn ussa da l'opiniun ch'il project nov mussia memia paucas correcturas cumpareglià cun lez.
In punct è qua la taglia sin las dividendas. Entant ch'il Cussegl federal aveva proponia da suttametter quellas els chantuns ad ina taglia da almain 70 pertschient, prevesa il project nov ussa mo ina taglia da almain 50 pertschient. Quai saja dentant memia bass, crititgescha la sanestra. Sch'ils socialdemocrats sustegnan pia cumplainamain quai cumpromiss n’è betg cler. Decider vulan els quai per suenter ch'il project definitiv è sin maisa.
Il squitsch da temps è dentant gronds. La Confederaziun ha annunzià da vulair midar las leschas da taglia enfin il 2020. Anc ina giada in naufragi na fiss qua betg bun.
Quai è uschia. Perquai èsi era previs che la fatschenta va ellas proximas trais emnas pliras giadas vi e nà tranter las duas chombras dal parlament. Sch'il project na vegn mesemna ussa betg renviads al Cussegl federal èsi da spetgar che la decisiun finala croda per il segund davos di da la sessiun. Lura han ton il Cussegl naziunal sco era il Cussegl dals chantuns da decider davart la proposta da la conferenza d'intermediaziun.
RR actualitad 12:00