Oz saja in di istoric, ha i gì num en Chasa federala. In pass impurtant per metter ord via las malgistadads ch'èn schabegiadas enfin ils onns 1980 en Svizra.
Da lez temp devi leschas cun las qualas ins pudeva serrar en persunas plirs mais senza decisiun dad in derschader, cun las qualas ins ha pudì sfurzar dunnas da dar liber lur uffants a l’adopziun. Cun la lescha ch’ins ha decidì oz pudain nus renconuscher quests malfatgs.
di la Cussegliera federala Simonetta Sommaruga curt suenter la decisiun da la chombra pitschna.
Per il Cusseglier dals chantuns Stefan Engler èsi stà uras da renconuscher ils fatgs e da trair in stritg. La lescha decidida saja in impurtant pass.
I vegn a dar la pussaivladad da survegnir in'invista en actas ed entras ina indemnisaziun cun mesira pon ins gidar las persunas pertutgadas ch’èn veglias.
Las 12’000 enfin 15’000 victimas duain ussa survegnir enfin 25'000 francs reparaziun per las malgistadads ch'ellas han stuì sentir.
Mo la lescha prevesa er che las actas vegnan archivadas e ch'ils pertutgads duain avair invista. Plinavant duain ils schabetgs da lez temp vegnir lavurads si a moda scientifica per ch'i na giaja nagut en emblidanza.
Gist quai stat era a cor a Guido Fluri che ha gì lantschà avant trais onns l'iniziativa da reparaziun:
Sche jau aud ch’ina persuna en ils 30 na sa betg tge ch’è ina sterilisaziun sfurzada è mussa quai che l’elavuraziun da quests schabetgs ha gist cumenzà.
Impurtant saja dentant era che las victimas survegnian ussa in sustegn finanzial.
Bleras persunas èn povras ed n’han betg blera segirezza da sasez.
E damai che bleras victimas sajan gia veglias e malsaunas fetschia prescha.
Medem vesa quai er Simonetta Sommaruga:
Sche nus vulain che quellas persunas retschaivan anc questa renconuschientscha e solidaritad ed era l'indemnisaziun finanziala stuain nus far vinavant e metter en vigur la lescha uschè spert sco pussaivel.
Perquai veglian els era retrair l'iniziativa, di Fluri. Las finamiras principalas hajan els cuntanschì. Il Cussegl federal vul metter en vigur la lescha l’emprim d’avrigl ed anc il medem onn duain las emprimas reparaziuns vegnir pajadas ora.
Actualitad da la saira