Lingias cotschnas vegnian surpassadas cun la revisiun da la lescha da chatscha, uschia il tenor dad organisaziuns da l’ambient sco era da protecziun dals animals. Cun la revisiun duai esser pussibel da schluppettar animals protegidas sco il luf u il castur, senza ch'els han insumma fatg in donn. Ina lescha che va pli lunsch che quai che la «moziun Engler» fiss ida. Quella vuleva far vegnir pli simpel da schluppettar il luf.
Nus vulain pudair controllar meglier il dumber, per exempel dals lufs e lura fa quai senn da midar la lescha uschia.
Quai saja però in'attatga frontala sin las spezias dals animals, sin la populaziun dals animals. Uschia hai num tranter auter tar la Pro Natura, nua che Silva Semadeni è anc enfin la fin da zercladur la presidenta.
Cumpetenza tar chantuns
Da nov duain ils chantuns e betg pli la Confederaziun avair la cumpetenza per dar ora il permiss da sajettar ils animals, per exempel ils lufs. Uschia la proposta da la revisiun.
Però Silva Semadeni di che l'avegnir dals animals stettia uschia en ils mauns dals chantuns e betg pli tar la Confederaziun. Lezza è en sasez responsabla per la protecziun dals animals periclitads e la biodiversitad en Svizra.
Il chantun Grischun fiss schon abel da regular sez, ma i dat anc auters chantuns ch'èn pli radicals. Perquai duai la Confederaziun dar la cumpetenza e betg ils chantuns.
Sche la lescha da chatscha vegn tras cun surpassar quellas lingias cotschnas piglian las organisaziuns da l’ambient e da la protecziun dals animals il referendum.
RR actualitad 06:00