Il center per la perscrutaziun da l'economia europeic ha examinà en 35 pajais las spartas economia, scienza, furmaziun, stadi e societad. Sco sulet pajais ha la Svizra fitg auts giudicaments en tuttas tschintg spartas. En l'economia occupa ella schizunt la plazza in, en la furmaziun il segund ed en las spartas scienza e societad mintgamai il terz plaz.
Las activitads dal stadi orientadas a l'innovaziun vegnan medemamain valitadas bain. Tenor il rapport publitgà haja quai da far cun la furmaziun che vegnia finanziada per gronda part dal stadi e cun las autas investiziuns dal stadi en la perscrutaziun da basa. Quai vegn tut resguardà en la valitaziun.
Gia dapi onns occupa la Svizra l'emprim plaz da l'indicatur. Sin las ulteriuras plazzas suondan il Singapur, la Belgia e la Germania. Sin ils ultims plaz èn quest onn la Brasilia, l'India, il Mexico, l'Indonesia, la Sidafrica, la Grezia, la Pologna e la Russia. Ils Stadis Unids èn amez la glista sin plazza indesch.
RR novitads 11:00