Tgi che sa mova en l'internet enconuscha quai: Dapertut ston ins dar en in pled d'utilisader ed il pled clav correspundent. Mo uschia san ins leger la gasetta, cumprar in pèr soccas u empustar in bigliet da tren. Per garantir la segirtad dovri dapertut in'autra cumbinaziun. Uschia han ins en curt temp ensemen ina detga rimnada da datas ch'ins sto tegnair endament.
Betg be evitar il dischurden ma er da dapli segirezza
Er ella enconuschia quai cun quels pleds clav, di la cussegliera federala Simonetta Sommaruga. Il sistem actual na possia betg mo chaschunar dischurden, mabain na saja n'er betg segir avunda.
I na saja numnadamain betg garantì, ch’insatgi auter na maldovria betg ses num ed avria en ses num in conto da clients tar ina stizun en l'internet. Gist quai duai la nova lescha impedir: «I duai vegnir pli segir ed i duai esser correct. Quai n’è betg mo en l’interess da mai mabain era egl interess da l’interpresa.»
Confederaziun vul collavurar cun interpresas privatas
Il Cussegl federal na vul dentant betg simplamain crear ina nova carta d’identitad mabain vul collavurar cun interpresas privatas. Quai haja blers avantatgs, di Sommaruga e fa allusiun a la telefonia ed al monopol da la PTT d'antruras:
«Da lez temp aveva il stadi anc decidì tge colur che voss telefon ha. Cun l’avertura da la fiera èsi stà pussaivel da cumprar differents telefons. L’infrastructura è dentant adina restada en ils mauns dal stadi.»
Datas restan tar la Confederaziun
Quai munta ch'il stadi ni pli concret ina partiziun en il Departament federal da giustia e polizia vegn a controllar e confirmar l'identitad dad ina persuna. En tge furma che quella identitad digitala – la uschenumnada E-ID – duai lura pudair vegnir duvrada duain dentant ils intermediaturs decider. «Ina giada pon ins far quai cun il telefonin, in’autra giada cun la carta da la VFF. I na fa betg senn, ch’il stadi prescriva tut quai. L’economia duai pudair sviluppar sezza lur offertas.»
Confederaziun vegn a tegnair en egl ils purschiders
Mo era qua vegni la Confederaziun ad avair in egl sin ils purschiders. Interpresas che vulan offrir tals servetschs d'identificaziun en l'internet ston ademplir las leschas per la protecziun da datas e sa suttametter a controllas severas, empermetta la ministra da giustia.
Ultra da quai na saja la nova identitad digitala betg da cumparegliar cun sistems gia installads sco la SwissID da la Posta e la Viafier federala. Entant che lezza sa er vegnir duvrada per suttascriver contracts a moda digitala duai la nova identitad digitala mo identifitgar la persuna.
Emprimas purschidas betg avant il 2020
Anc n’èsi dentant betg uschè lunsch. Enfin la stad sto il Departament federal da giustia e polizia ussa ina giada elavurar in messadi per ina lescha nova. Il pli baud il 2020 savessan lura emprimas purschidas vegnir lantschadas.
RR actualitad 17:40