Ils donns da delicts economics en Svizra èn sa dublegiads il 2019. L'onn passà han ils donns muntà a 363 milliuns francs, il 2018 eran quels anc tar 166 milliuns. Quai annunzia l'interpresa da cussegliaziun KPMG ses barometer da fraud. Er la summa da delicts en media saja cun var 7,7 milliuns francs dubel uschè auta sco anc il 2018.
La KPMG fa er attent, che la cifra zuppada dastgassi esser bler pli auta.
«Insiders» sco pli grond privel
Tar ils delinquents tutgan dad ina vart collavuraturs e bandas organisadas. Dentant er las manadras ed ils manaders da las firmas tutgan tar ils delinquents. La summa da donns che quellas persunas han chaschunà il 2019 saja tar 136 milliuns francs – 10 giadas dapli ch'anc l'onn avant.
Pertutgadas da delinquents economics sajan tenor la KPGM surtut instituziuns publicas e persunas privatas.
