Actualmain quinta l'Uffizi da traffic federal, ch'il donn causà tras il scandal tar l'Auto da Posta Svizra SA sa muntia a 78 milliuns francs. Picant: Ils 78 milliuns sa duajan basar sin il quint da la Posta sezza. Quai fa sfruschar ils egls als giurists e las giuristas.
Sin dumonda da SRF ha valità l'experta per dretg penal economic, Monika Roth, quest agir la sonda a bun'ura.
Sco tar il lader che calculescha sez la summa da ses donn
Per l'experta èsi cler: Ch'il suspectà calculeschia sez la summa causada entras ses delict na saja betg usità. L’Uffizi federal da traffic avessi da s'occupar cun la summa da donn.
L’uffizi per encunter sa dosta. El haja surlaschà la lavur a la Posta per evitar lavur dubla. En pli correspundia la summa da donn da 78 milliuns, che la Posta haja calculà, a la summa schazegiada da l’uffizi sez.
Auto da Posta vegn a stuair pajar anc dapli che 78 milliuns
Tenor Monika Roth saja bain pussibel che la summa che l'Auto da Posta haja da pajar enavos vegna anc bainquant pli auta: Sper il donn causà stoppia numnadamain er anc vegnir pajà in tschains da delict da radund 5%.
Quests tschains n'haja la Posta anc betg resguardà en sia calculaziun rapporta SRF.
Parlament naziunal tracta il scandal proximamain
Il parlament tracta il cas Auto da Posta anc en la sessiun da primavaira. Il biro dal Cussegl naziunal ha declerà sco urgent set interpellaziuns, tranter questas era quella da tractar la pratica da finanzas da l'Auto da Posta. La discussiun è previsa ils 14 da mars. La decisiun da declerar l'interpellaziun sco urgenta era crudada unanimamain.
Actualmain examinescha la Fedpol co che l’Auto da Posta Svizra SA ha sa laschà subvenziunar tar il traffic regiunal. Tar ina revisiun regulara aveva l'Uffizi federal da traffic constatà irregularitads: L’Auto da Posta haja transferì durant plirs onns gudogns da la sparta subvenziunada dal traffic public en ina sparta betg subvenziunada. Da far gudogns en la sparta subvenziunada è però scumandà. Perquai haja l'Auto da Posta Svizra SA da pajar enavos almain 78 milliuns francs.
RR novitads 12:00