A Losanna vul ins ussa cumbatter la malsogna cun in nov center. Avant paucs dis è stada l’emprima badigliada. Purtadra dal project è l'institut svizzer per la retschertga experimentala davart il cancer, ISREC. 80 milliuns francs ha la fundaziun rimnà per construir il center ambizius nua che 300 perscrutaders e medis duain lavurar.
L’idea è da reunir tut las cumpetenzas scientificas e medicalas uschè datiers dal pazient sco pussaivel. Tut quai senza sminuir la qualitad da ses tractament.
Il barat direct tranter ils medis duai vegnir a favur dals pazients. I dettia bunamain tuttina bleras variantas da cancer sco pazients. Cun lavurar pli stretg duai era il tractament dals pazients vegnir individualisà tant sco pussbel, di Perret. La medischina duai vegnir pli persunalisada, pli precisa.
Tge munta quai per la chemo- e radioterapia?
Questas duas terapias na possian ins betg simplamain stritgar. Tar in tractament individual tutgian era questas duas pussaivladads. La malsogna saja intelligenta ed i saja impurtant d'esser pli svelt che lezza.
L'entschatta dal 2018 duai l'ospital arver sias portas a Losanna. Là sperani da pudair gudagnar in bun renum cun l'AGORA.
RR actualitad 11:00