Ids a l'urna fissan 40% – ina participaziun plitost bassa. Pervi da las vacanzas da stad na saja la populaziun svizra anc betg en modus da votar ed er las campagnas n'hajan anc betg survegnì schlantsch. Quai scriva l'institut gfs.berna, che ha fatg l'enquista sin incumbensa da la SRG SSR.
Iniziativa da fair-food
En tut avessan 78% acceptà l'iniziativa. E tuttina saja il resultat da la votaziun avert ed i dettia anc potenzial ch'il resultat pudess sa midar tar in Na, scriva gfs.berna. Per l'ina n'hajan blers anc betg furmà in'opiniun, per l'autra n'haja la campagna cunter l'iniziativa anc betg cumenzà.
![La retschertga da gfs.bern mussa che 78% èn il mument per l'iniziativa da fair-food.](https://www.rtr.ch/static/cms/images/960w/89e041.jpg)
Iniziativa per la suveranitad alimentara
Era l'autra iniziativa agrara chatta sustegn: Total 75% da las votantas e dals votants svizzers avessan ditg Gea. Tge resultat ch'i dat ils 23 da settember è però anc avert. Critic s'expriman surtut umens, giuvenils, persunas cun grondas pajas, persunas che vivan en l'aglomeraziun u en la Svizra taliana e persunas che han fidanza en la regenza.
![La retschertga da gfs.bern mussa che 75% èn il mument per l'iniziativa per la suveranitad alimentara.](https://www.rtr.ch/static/cms/images/960w/6fbce8.jpg)
Conclus federal davart las vias da velo
Il mument èn 64% da la populaziun svizra per u plitost per acceptar il conclus federal. Opposiziun datti fin uss sulet da la Partida populara svizra. Consentiment survegn il conclus cunzunt perquai ch'ir cun velo tutga tar il mintgadi da blers.
![La retschertga da gfs.bern mussa che 64% èn il mument per il conclus federal davart las vias da velo.](https://www.rtr.ch/static/cms/images/960w/118dd0.jpg)
Enquista dal GfS sin incumbensa da la SRG SSR
L'enquista ha fatg la Societad svizra da retschertgas socialas praticas (GfS) sin incumbensa da la SRG SSR. Per l'enquista han ins dumandà 1200 votants tranter ils 30 da fanadur ed ils 10 d'avust 2018. La quota d’errur è tar +/- 2,9%, quai tar ina probabilitad da 95%. Plinavant fan ils auturs da l'enquista attent, che quels resultats mussan la situaziun mumentana da 50 dis avant la votaziun federala.
RR novitads 06:00