Tar pandemias e sumegliantas crisas da sanadad vul il Cussegl federal en l'avegnir tadlar meglier sin la scienza avant che prender decisiuns. Vitiers vul il Cussegl federal meglierar sia communicaziun en talas situaziuns. Uschia respunda el sin la critica da la cumissiun da gestiun dal Cussegl naziunal. Quel aveva giuditgà la lavur dal Cussegl federal en connex cun la crisa da corona e formulà otg recumandaziuns.
Ina rait da scienzadas e scienzadas duai vegnir consultada en cas da crisa, e quella possia esser organisada meglier davart da la regenza. Ed era la communicaziun cun il public possia vegnir meglierada. Ins duai sa basar sin scuvertas scientificas ed er far transparent tge puncts ch'èn anc malsegirs e vegnan dispità. Ina task-force scientifica sco durant il temp da corona duai vegnir consultada e bajegiada si pli baud. Tenor la cumissiun da gestiun haja quella numnadamain fatg buna lavur.
