Ils fatgs socials svizzers han dà or bler per mitigiar las consequenzas negativas da la pandemia. 14 milliardas francs dapli custs hai dà sulettamain en il sectur da la dischoccupaziun il 2020. Ils daners èn stads necessaris per:
- indemnisaziun per lavur reducida
- indemnisaziuns per persunas cun activitad da gudogn independenta
- diarias supplementaras per persunas dischoccupadas
Uschia hajan ins evità in augment da dischoccupaziun pli grond, scriva l'Uffizi federal da statistica.
En tut muntan ils custs per ils fatgs socials (custs pervia da dischoccupaziun includids) a 200 milliardas francs. Quests ed ulteriurs resultats mussa il rapport social statistic da la Svizra 2023.
Povradad en Svizra
Sche tut ils transfers socials sco per exempel supplements da famiglia, rentas d'invaliditad, reducziun da las premias da la cassa da malsauns, agid social u diarias da l'assicuranza cunter la dischoccupaziun vegnan quintads vitiers, importa la quota da povradad anc 8,7%. Pertutgadas spezialmain savens èn era qua persunas senza gudogn, persunas en in tegnairchasa sulet, cun naziunalitad estra sco era senza in diplom da furmaziun postobligatoric.
La lavur da gudogn n'è dentant betg adina in garant per l'existenza, 4,2% da la populaziun cun activitad da gudogn vivan sut il cunfin da povradad.
Persunas fitg cuntentas cun lur situaziun finanziala
Las cundiziuns da viver da la populaziun en Svizra èn caracterisadas d'ina part creschenta da persunas ch'èn fitg cuntentas cun lur situaziun finanziala. I sa tracta qua en spezial dals profils cun entradas autas, sco per exempel las persunas sur 64 onns, las persunas cun proprietad d'abitar, in diplom da furmaziun terziar sco er las Svizras ed ils Svizzers.
Da l'autra vart han las gruppas da la populaziun cun las pli pitschnas entradas fadia da pajar las expensas las pli necessarias. Latiers tutgan en spezial persunas senza activitad da gudogn, persunas cun naziunalitad estra, persunas senza in diplom da furmaziun postobligatoric sco er chasadas cun geniturs. Er tar la furmaziun e tar la sanadad pon ins constatar differenzas socialas. Uschia è per exempel la participaziun a furmaziuns supplementaras tant pli auta, pli meglier ch'il nivel da scolaziun è e persunas senza scolaziun postobligatorica desistan pli savens da prestaziuns medicinalas.