Las mesiras na tanschian probablamain betg, han tant Berset, sco er il president dals directurs chantunals da sanadad Lukas Engelberger manegià. Els n'èn dentant betg s'exprimids puncto mesiras concretas - cunquai che quellas èn il mument en consultaziun. Probabel vegnia il Cussegl federal a decider proxim venderdi davart ulteriuras restricziuns.
Augmentar tempo tar booster
Il minister da sanadad Alain Berset ha ditg ch'ins stoppia augmentar il tempo da dar il terz vaccin, per che tuttas e tuts che vulan laschar dar quel survegnian in termin. Chantuns hajan grondas sfidas logisticas en quest connex. La Confederaziun fetschia bler per sustegnair ils chantuns, quai per exempel cun trametter persunal da l'armada.
Vaccinar uffants a partir dal schaner
Sper la coordinaziun da las emprimas dosas da vaccin ed il booster vegn vitiers il schaner il vaccinar uffants. Tenor Alain Berset stettian actualmain a disposiziun in mez milliun dosas per uffants da tschintg enfin dudesch onns. L'idea saja da cumenzar da vaccinar quels a partir dal cumenzament da schaner. Er ils chantuns sa preparian d'esser pront per vaccinar uffants, ha ditg Lukas Engelberger. Pussaivel saja da principi ch'uffants survegnian la virola en centers existents ubain tar il medi d'uffants.
