Successiun chancelier federal - Lukas Gresch ha annunzià sia candidatura
Ils 13 da december na vegn betg be elegì il Cussegl federal, dentant er in nov chancelier u ina nova chanceliera federala. Quel post vala sco «otgavel cusseglier federal» – ina plazza cun blera pussanza. Pliras partidas han annunzià ina candidatura.
1 / 4
Legenda:
Lukas Gresch, senza partida.
Keystone
2 / 4
Legenda:
Viktor Rossi, Partida Verd-liberala.
Keystone
3 / 4
Legenda:
Nathalie Goumaz, PPS.
Keystone
4 / 4
Legenda:
Gabriel Lüchinger, PPS.
Keystone
Il secretari general dal departament da l'intern svizzer Lukas Gresch vul daventar chancelier federal. Gresch haja annunzià uffizialmain sia candidatura, scriva la gasetta «Schweiz am Wochenende». Gresch ha 51 onns, è senza partida e lavura dapi 14 onns en l'administraziun federala. Sper Gresch datti fin ussa trais ulteriuras candidaturas per la successiun da Walter Thurnherr.
Il «otgavel cusseglier federal»
Avrir la boxSerrar la box
Malgrà ch'il post da chancelier federal n'ha betg il status da cusseglier federal, ha quella posiziun ina grond'influenza. Il chancelier federal è da la partida tar mintga sesida dal Cussegl federal – er sch'el na po betg votar. El ha dentant il dretg da far propostas. Plinavant persequitescha il chancelier u la chanceliera ils trends internaziunals – in agid da decisiun per la regenza.
Il chancelier federal vegn er numnà il «otgavel cusseglier federal».
PPS trametta duas persunas en la cursa
La Partida populara svizra (PPS) ha annunzià da candidar per il post da chancelier. Ina candidata è Nathalie Goumaz da la Svizra franzosa. Actualmain è ella secretaria generala dal Departament d'economia, furmaziun e perscrutaziun. L'auter candidat è Gabriel Lüchinger. El è actualmain schef da la partiziun segirtad internaziunala tar il Departament federal d'affars exteriurs.
Gia annunzià da vulair daventar il nov chancelier federal ha Viktor Rossi da la Partida verd-liberala. El è actualmain vicechancelier. En quella funcziun è el tranter auter responsabel per las var 1'300 intervenziuns parlamentaras che vegnan inoltradas mintg'onn.
La partida liberaldemocratica e la partida verda n'hajan nagin interess vid il post. Quai han ellas ditg envers l'agentura da novitads Keystone-SDA.
«Premi da consolaziun» per partidas verdas
Avrir la boxSerrar la box
Tenor la «furmla magica» actuala, n'avessan las partidas verdas dabun nagin sez en il Cussegl federal. Verdliberals e Verds han ensemen dentant ina cumpart da passa 18% – dapli che la PLD ubain l'AdC. Ina persuna d'ina partida verda fiss pia giustifitgada. Cun survegnir il post da chancelier federal avessan las partidas verdas dapli schanzas da pigliar influenza en l'executiva – schebain betg direct.
Da l'autra vart: sche las partidas verdas pudessan metter la chanceliera u il chancelier federal, fissi per els pli difficil da survegnir in sez en il Cussegl federal.
Walter Thurnherr sa retira
La stad passada ha il chancelier federal Walter Thurnherr annunzià da sa retrair. El era otg onns en uffizi. Politicamain è el s’occupà ils onns passads tranter auter cun l'elavuraziun da la crisa da corona, cun la digitalisaziun da l’administraziun federala e cun il dossier da la votaziun electronica. Thurnherr appartegna a l'Allianza dal Center. Quella vegniva en in tschert senn cumpensada perquai ch'ella ha mo in sez en il Cussegl federal.
