Las canortas svizras han memia paucs daners. Perquai ston ellas sa gidar cun emploiar persunas betg qualifitgadas. Uschia na possian las canortas betg garantir ils standards da qualitad. Quai è il facit d'in rapport da la Scola auta da Lucerna (HSLU). Plinavant saja vegnì fatg memia pauc per segirar la qualitad.
Situaziun per part «precara»
Cifras concretas davart persunal betg-qualifitgà en canortas na dettia betg. Ins haja stimà ch'almain la mesadad dal persunal n'haja betg ina scolaziun renconuschida. Il studi è vegnì fatg cun intervistas cun persunas pertutgadas e cun retschertgas online.
Era las cundiziuns da lavur dal persunal vegnan descrittas sco «precar». Las pajas sajan fitg bassas, ils pensums era. Contribuziuns per la cassa da pensiun na sajan betg garantidas. Plinavant saja la lavur fitg intensiva e hectica.
Influenza sin uffants
Questa situaziun influenzeschia er il svilup dals uffants, averteschan ils auturs e las auturas dal rapport. Cunquai daventian problems da sanadad e socials pli probabels en il decurs da la vita dals uffants.
A media vista duess il persunal betg-qualifitgà survegnir pussibilitads da sa scolar. A lunga vista fissi bun dad adattar ils nivels da qualificaziun da las canortas a quels dal rest dal sistem da scolaziun. Quai èn las pretensiuns che resultan or dal studi.
