Circuls burgais vulan lantschar mardi in’iniziativa che vul abolir il scumond da bajegiar novas ovras atomaras. Il comité d’iniziativa ha confermà in rapport correspundent da la «SonntagsZeitung». Il scumond da novas ovras atomaras aveva il pievel svizzer decis avant 5 onns – ensemen cun la strategia d'energia 2050.
L'iniziativa na possia a curta vista betg schliar il problem actual cun la mancanza d'energia che smanatschia. A lunga vista saja la midada da l'energia però be pussaivla cun energia atomara, uschè il comité. Perquai duai il scumond da tecnologia atomara vegnir stritgà ord la lescha correspundenta. Fin la primavaira ston ils iniziants ramassar las 100'000 suttascripziuns necessarias.
Cuntravent sa furma svelt
Questa iniziativa na gidia betg da schliar problems en la realitad. Quai ha scrit in'allianza da politicras e politichers naziunals curt suenter ch’ils plans da l'iniziativa èn vegnids enconuschent. En Svizra na dettia actualmain nagina firma che vul investir en tecnologia atomara. Quai saja memia char ed il problem dal rument atomar na saja anc adina betg schlià.
