Statistica - L'industria svizra sa revegn vinavant

L’industria svizra è sa revegnida vinavant l’ultim quartal dal 2021. Cunquai ha l’industria pudì far bun las grondas perditas da l’onn avant. Concret è la producziun da l’industria creschida per 6,2% il quartal passà, cumpareglià cun la medema perioda da l’onn avant. Sco l’Uffizi federal da statistica ha communitgà, ha la branscha da construcziun nudà in plus da 0,2%. Tar la construcziun auta e bassa percunter è la producziun ida enavos per 3,5 respectivamain 3,6%.