En Svizra han ins pudì observar l’onn 2020 grondas differenzas da paja, tut tenor il svilup economic. Cleramain sur la paja mediana sa chattavan las pajas en branschas sco la tecnologia d’infurmaziun (9'206 francs), l’industria da farma (10'040 francs) u las bancas (10'211 francs). Amez la scala èn branschas sco il traffic (6'310 francs), il sectur da sanadad (6'821 francs), l’industria da maschinas (7'141 francs) ed il commerzi (7'145 francs). Sin ils davos plazs èn il commerzi en detagl (4'997 francs), la gastronomia (4'479 francs), l’alloschament (4'488 francs) e las prestaziuns da servetsch persunalas (4'211 francs).
Dunnas han gudagnà stgars 11% pli pauc ch'umens
La differenza da paja tranter um e dunna è sa reducida be per pauc durant il 2020. Quai mussan las novas cifras da l'Uffizi federal da statistica. Il 2020 han dunnas gudagnà en media 10,8% pli pauc ch’ils umens. La differenza è uschia sa reducida per 0,7%. Questa discrepanza possian ins per part declerar cun differenzas da responsabladad e differentas branschas. La paja mediana brutta è il 2020 stada tar 6'665 francs per mais. Vul dir: la mesadad dals emploiads gudogna dapli, l'autra mesadad pli pauc.
Pajas en las regiuns: Turitg resta a la testa
Las pajas varieschan en la Svizra er tranter las regiuns. Las pajas per cader superiur èn regularmain las pli autas a Turitg, cun in median da 11'475 francs ed en la regiun da Genevra, 11'200 francs. Las pli bassas pajas ha il Tessin. In cader superiur fadia là en media 8'537 francs ed insatgi senza funcziun da manar survegn 5'137 francs. Questas differenzas da paja regiunalas pon vegnir decleradas tras la concentraziun da secturs economics cun gronda valur en tschertas regiuns e tras particularitads structuralas dals martgads da lavur regiunals.
