Il traffic da return da Pasca è ferm quest onn. Las colonnas davant il portal sid dal Gottard èn sa schliadas mesemna saira. Il traffic da return da chaschunà per part colonnas dad 8 kilometers lunghezza tranter Quinto ed Airolo. Quai ha communitgà il servetsch da traffic Viasuisse. La mesemna è cun quai stà il quart di en seria ch’il traffic da Pasca ha chaschunà colonnas sin l’autostrada A2.
La situaziun il venderdi sontg
La colonna sin l'A13 è creschida il suentermezdi fin sin 16 kilometers, quai che ha muntà ad in temp da spetga dad 1 ura e 15 minutas. Vers la saira è la situaziun lura sa quietada e la colonna è sa schliada. Sin trajects da l'A13 hai dentant anc adina dà bler traffic e temps da spetga.
Betg mo sin las vias grischunas hai duvrà pazienza sur Pasca, ma er sco usità davant il tunnel dal Gottard. Tranter la cruschada Altdorf e Göschenen è la colonna stada fin a 22 kilometers lunga ed ils automobilists han gì da spetgar fin a 3 uras e 40 minutas. La notg da gievgia sin venderdi era la colonna almain per in mument sa reducida sin 8 kilometers.
Ils onns avant la pandemia avevi adina dà la lunghezza maximala da colonnas tranter las 08:00 e las 15:00 dal venderdi. Il 2019 è il traffic lura puspè culà pli u main normal a partir da las 19:00 la saira.
Gia mesemna colonnas al Gottard
10 kilometers colonna hai dà mesemna al Gottard. Quest dumber è in nov record, scriva Viasuisse. Ils ultims set onns n'hai mai gì dapli che 7 kilometers la mesemna avant Pasca. Er sin l'A13, tranter Panaduz e Giuvaulta avevi dà mesemna suentermezdi colonna en omaduas direcziuns, Qua era dentant in accident la raschun.
Il gust da viagiar saja suenter corona creschì, sco l'Uffizi federal da vias ASTRA declera. Uschia ha l'uffizi prognostitgà gia avant ils dis da firà ina stagnaziun dal traffic avant il portal dal nord al Gottard. L'unda per il viadi enavos a chasa en direcziun nord spetga l'ASTRA a partir da dumengia suentermezdi. Ma er glindesdi da Pasca saja da quintar cun in traffic augmentà.
Bler traffic er als eroports
Il port aviatic a Turitg quinta cun radund 70'000 passagieras e passagiers il di. Quai correspunda a radund 70% dal nivel avant la pandemia, sco ina pledadra da medias ha ditg ad SRF. Per cumparegliar: Da Pasca avant in onn ha l'eroport da Turitg gì en media 13'200 persunas il di. Fitg popularas sajan tenor la pledadra, viadis en citads, sco a Londra u Amsterdam, dentant er sgols a Palma de Mallorca u Dublin.
