Ils appels da spargnar forza electrica han gia fatg effect. Tar interpresas grondas saja il consum sa reducì per 3% fin 4%. Tar interpresas pitschnas schizunt per 5%. Quai ha ditg Karl Resch da las Ovras electricas dal chantun Turitg EKZ envers la «Tagesschau» dad SRF. Quai suenter avair analisà la terza emna da settember.
Auter vesa quai or en il Grischun
Ils appels da spargnar forza electrica n'han para anc betg cuntanschì l'economia grischuna. Tenor Christian Capaul, il mainafatschenta da l’interpresa d’energia Rhiienergie datti schizunt interpresas grondas che dovrian il mument marcantamain dapli forza electrica. Quai rapporta la «Südostschweiz». Capaul suppona che questas interpresas produceschian actualmain sin reserva, uschè ditg ch’ils pretschs dal current electric sajan anc favuraivels. Ma er las chasadas privatas na spargnian tenor la Repower betg forza electrica. Anzi, il settember hajan ellas duvrà 0,5% dapli forza electrica, cumpareglià cun la medema perioda da l’onn avant.
Auters furniturs d'electricitad n'han anc betg pudì far indicaziuns u n'han betg constatà ch'il consum saja sa reducì. La campagna da spargnar forza electrica che la Confederaziun ha lantschà la fin d'avust custa passa 10 milliuns francs.
