Gist suenter ch’il suveran ha ditg cun 62 pertschient cleramain Gea a la revisiun da la lescha da Covid-19 sa fatschenta il Parlament federal cun novas adattaziuns da la lescha. En emprima lingia vai per prolungar tschertas mesiras che scadan la fin da l’onn. Uschia propona il Cussegl federal da prolungar ils sustegns per la cultura ed il sport sco era per ils tests da corona ed il contact tracing.
Las duas chombras dal parlament sustegnan quai, vulan en tscherts secturs dentant ir pli lunsch ch'il Cussegl federal. Uschia duain era las mesiras ed ils levgiaments tar la lavur curta e la dischoccupaziun cuntinuar. En il Cussegl naziunala datti era propostas da puspè introducir tests da corona gratuits per tut la populaziun.
Revisiun AVS prest decidida
In auter tema che procura era adina per agitaziun è il provediment per la vegliadetgna. Era qua ha il parlament da decider en la sessiun d’enviern. Ed i va gist per las emprimas duas pitgas dal provediment. Tar l'AVS è il parlament en la runda finala. Tema principal è qua anc adina la vegliadetgna da pensiun da las dunnas e co las annadas pertutgadas da la midada da 64 sin 65 onns duain vegnir sustegnidas. Qua smanatscha gia il referendum. La sanestra ha annunzià ch'ella vegnia a cumbatter l'augment da la vegliadetgna da pensiun da las dunnas.
E lura cumenzan las debattas davart la segunda pitga en il Cussegl naziunal. Ils partenaris socials, ils patruns ed ils sindicats, avevan elavurà ina proposta communabla che vul bain reducir la tariffa da conversiun dad oz 6,8 sin 6 pertschient, prevesa dentant da cumpensar la sperdita cun sustegns directs a la renta.
La cumissiun dal Cussegl dals chantuns na vul dentant savair nagut da quai cumpromiss ed ha elavurà in'atgna proposta. Quella prevesa era sustegns per las emprimas annadas pertutgadas da la refurma, ella metta dentant dapli paisa sin dapli entradas. Uschia duain tranter auter gia persunas da 20 onns cumenzar a spargnar per la vegliadetgna ed i duai dar dapli pussaivladads da sez spargnar per la pensiun. Sche quellas propostas chattan en omaduas chombras ina maioritad è grev da dir il mument. Cler è dentant era qua – la fin finala vegn il suveran a decider a l'urna en chaussa.
Iniziativa vul promover bainstar dals animals
La Svizra duai s'engaschar dapli per il bainstar dals animals e scumandar da tegnair animals en grondas quantitads, pretenda in’iniziativa che vegn tractada sco emprim en il Cussegl naziunal. Concret duain almain ils criteris da Bio Suisse valair quai che pertutga per exempel il tegnair ils animals, la tgira da quels e la moda e maniera co ils animals vegnan mazzads. Quai na duai betg mo valair per ils animals en Svizra mabain era per igl import d'animals e products d'animals. Realisar quellas pretensiuns stuess il parlament tar in Gea a l'iniziativa entaifer 25 onns.
Per il Cussegl federal va l'iniziativa memia lunsch. El vul dentant preschentar ina cuntraproposta directa che vul prender si l'idea centrala da l'iniziativa – il bainstar dals animals – en la Constituziun, dentant senza las reglas strictas da Bio Suisse. En il parlament han dentant tant l’iniziativa sco era la cuntraproposta pauc sustegn. La cumissiun d’economia dal Cussegl naziunal propona da dir Na ad omaduas projects.