Cun l’agentura Publicis ha Curdin Janett, oriund da Tschlin, creà campagnas da reclama per interpresas grondas sco Salt, Swiss u era Nestlé. L’onn 2015 ha el gudagnà il premi Egon sco meglra agentura da reclamas Svizra. Suenter passa 20 onns ha el midà branscha. Ord la problematica dal digren da las chascharias pitschnas è naschì l’idea dad ina fatschenta da chaschiel.
Chaschiel n'è betg chaschiel! Bun chaschiel creescha regurdientschas!
Ensemen cun ses collega Michael Fankhauser, in anteriur expert da marketing, ha el fundà la firma «Fromage Mauerhofer» a Burgdorf. En collaboraziun cun chascharias regiunalas produceschan els chaschiel da buna qualitad che vegn nobilisà e madirà en lur agen tschaler. La finamira è da producir e vender in chaschiel sco el vegniva fatg avant l’industrialisaziun da questa branscha. Per ils dus afficinados da chaschiel è lur nova interpresa dentant en emprima lingia ina chaussa da cor.