La Svizra ha registrà dapli cunfinaris il segund quartal da l’onn. Lur dumber saja s’augmentà per 6% sin radund 370'000, cumpareglià cun la medema perioda da l’onn passà. Quai ha communitgà l’Uffizi federal da statistica.
Passa la mesadad dals cunfinaris hajan dimora en Frantscha. Er gronda saja la cumpart da persunas che vivian en l’Italia u en la Germania e lavurian en Svizra. Ils ultims tschintg onns saja il dumber da cunfinaris s’augmentà per 16%.
