La guerra tranter la Russia e l’Ucraina haja mussà che campagnas da desinformaziun ed influenza, attatgas da cyber, operaziuns zuppadas e conflicts armads sajan smanatschas pli e pli concretas e realas per la Svizra. Per rinforzar las capacitads da sa defender saja perquai en l'interess da la Svizra da collavurar pli stretg cun auters stadis da l’Europa, concret cun la NATO e l’UE. Quai ha declerà la ministra da defensiun Viola Amherd a Berna.
Latiers tutgan per exempel da sa participar dapli ad exercizis, extender la collavuraziun militara sin secturs relevants per la defensiun, intensivar il status da partenadi tar la NATO u ina participaziun da l'armada a federaziuns da l'UE sco la UE Rapid Deployment Capacity che fan operaziuns da salvament, d'evacuaziun e da stabilisaziun.
Eliminar largias da segirtad
Il rapport ha plinavant prendì sut la marella las abilitads da l’armada svizra e constatescha che quellas sajan sin buna via. Quai en ils secturs dal manar, da la cyberdefensiun, da la mobilitad e da la protecziun cunter attatgas or da l’aria. Largias dettia dentant tar la defensiun cunter chars armads e tar la muniziun. Grazia a l’augment dals meds finanzials per l’armada possian quellas largias dentant vegnir eliminadas el decurs dals proxims onns, uschia il Departament federal da defensiun VBS.
Sustegn e critica da las partidas
La Partida liberaldemocratica e l'Allianza dal Center beneventan ils plans dal Cussegl federal. Uschia scriva l'Allianza dal Center ch'era la Svizra stoppia far sia part per la politica da segirtad europeica. L'armada stoppia vegnir modernisada, per ch'ella saja pronta da reagir sin ils privels dal 21avel tschientaner, sco per exempel sin attatgas da cyber, u sin guerras convenziunalas. La Partida liberaldemocratica fa attent ch'ella pretendia gia dapi il zercladur da collavurar pli fitg cun la EU e la Nato sch'i va per la defensiun. Dentant veglia la PLD ir en general sut ils cudeschs tar la defensiun. Critica datti percunter da la Partida populara e la Partida socialdemocratica: Da s'avischinar a la NATO na correspundia betg a la neutralitad da la Svizra e perecliteschia la segirtad en Svizra.
