- Pervi dal coronavirus valitescha il Cussegl federal la situaziun mumentana sco «speziala» tenor la lescha d'epidemia.
- Occurrenzas grondas cun dapli che 1'000 persunas vegnan scumandadas. Il scumond vala fin ils 15 da mars.
- I n'è betg previs da recumpensar ils donns economics che la mesira chaschunia.
- Entant èn 15 persunas s'infectadas cun il virus e passa 100 sa chattan en quarantina. Ed i saja da quintar cun anc dapli cas.
- Ils chantuns beneventan la decisiun dal Cussegl federal. La mesira procuria per clerezza er tar els.
- La situaziun saja sut controlla, ma ella sa sviluppia fitg svelt.
- Fin uss n'hai anc nagin cas en Svizra nua ch'ins ha pers la chadaina d'infecziun. Plinavant èn fin ussa tuttas persunas s'infectadas ordaifer la Svizra.
La protecziun da la populaziun haja la prioritad la pli auta per il Cussegl federal. Perquai che la situaziun vegn valitada sco speziala ha il Cussegl federal, en discurs cun ils chantuns, la pussaivladad da prender mesiras che fissan normalmain en la cumpetenza dals chantuns. Igl è l'emprima giada ch'il Cussegl federal fa diever da questa lescha.
Occurrenzas grondas scumandadas
Il Cussegl federal scumonda occurrenzas publicas e privatas nua che passa 1'000 persunas fissan al lieu. Il scumond vala per immediat fin almain ils 15 da mars. Tar occurrenzas cun pli pauc che 1'000 persunas ston ils organisaturs valitar il ristg ensemen cun las autoritads chantunalas. Betg pertutgads èn per exempel bajetgs da lavur nua ch'i ha era dapli che 1'000 persunas. Là saja il persunal abel da resguardar las mesiras d'igiena. Ed i saja la finala pussaivel da suandar la chadaina d'infecziun.
Occurrenzas stritgadas en il Grischun
Il chantun Grischun ha gia la gievgia decidì mesiras. Sin basa da quellas han ils organisaturs dal Maraton da skis engiadinais decidì da desdir quel.
Plinavant n'han er ils tils e las festas tradiziunalas da Chalandamarz en l'entira Engiadina e Val Müstair betg lieu.
Franar derasaziun
Il Cussegl federal scriva ch'el saja bain pertschert che questa mesira haja grondas consequenzas per la populaziun svizra. Ella empermettia dentant da proteger a moda effizienta la populaziun en il pajais. En spezial persunas ch'èn flaivlentadas. Entras questa mesira duai la derasaziun dal coronavirus vegnir franada. Ella correspundia er a quai che l'Organisaziun mundiala WHO cusseglia. Plinavant haja questa mesira er gia mussà effect en auters pajais, ha declerà la presidenta da la conferenza dals directurs e las directuras chantunalas da sanadad Heidi Hanselmann.
RTR novitads 11:00
