26 minutas e 30 secundas hai cuzzà quest onn fin l'explosiun anticipada. Il corp brischava ed explodiva gia fitg enturn la 21avla mintua – il chau dal Böögg è dentant sa mussà pli stinà. Anc ulteriuras 4-5 minutas plain tensiun hai cuzzà fin ch'il chau è medemamain crudà per terra. Cunquai hai pia num: bainvegni a la stad!
Per cumparegliar: Il pli ditg hai cuzzà l'onn 2023 enfin ch'il chau dal Böögg è finalmain explodì – nunditgas 57 minutas ha il chau brischà e laschà spetgar ils aspectaturs e las aspectaturas plain tensiun. Auters onns ha il Böögg percunter gì prescha: il 1956 è il chau gia explodi suenter be bun 4 minutas. Qua ina survista dals temps fin l'explosiun dal Böögg sur ils onns.
Bun'aura, buna luna a Turitg
Sechseläuten da Turitg ha la bun'aura da sia vart: cun sulegl splendurant èn tschients commembers da las mastergnanzas (Zünfter) passads tras la citad da Turitg. Ils ins a chaval, auters marschond losch a pe. Millis aspectaturs ed aspectaturas als han giubilà.
Bleras persunas dal public persequiteschan regularmain la festa da primavaira da Turitg cun: «Jau sun mintg'onn da la partida», di in uffant. Ses highlight saja l'arder il Böög. Il spectacul suenter il til ha cumenzà punctualmain a las 18.00 sin il Sechseläutenplatz.
Quest onn explodescha il Böögg puspè a Turitg
L'onn passà n'è el per l'emprima giada betg vegnì dà fieu a Turitg pervi da ferms vents. Pir dus mais pli tard è el lura ars en il chantun ospitant Appenzell Dadora. Ina tala explosiun en l'exil na duai betg sa repeter quest onn. E grazia a la bell'aura gartegia quai quest quest onn ch'il Böögg po restar a chasa.
Al cortegi sa participeschan mintgamai var 3'500 commembers e commembras da las mastergnanzas. Cun els marschan var 120 giasts d'onur: Gist quatter cussegliers federals dattan quest onn l'onur in a l'auter. Latiers tutga il cusseglier federal da Zug Martin Pfister (Il Center). Il minister da la defensiun fa ina visita a la Zunft a Wiedikon. Ultra da quai èn Albert Rösti (PPS), Ignazio Cassis (PLD) e Guy Parmelin (PPS) da la partida al cortegi.
Guy Parmelin lascha plaschair
Il minister d'economia Guy Parmelin sa legra dal Sechseläuten: «Quai è ina buna tradiziun e fa grond plaschair da questa bell'aura», di il cusseglier federal. Giasts d'onur n'èn betg mo da la partida al til. Els passentan l'entir di cun lur mastergnanza e ston tegnair in pled sco cuntraprestaziun.
Il Sechseläuten è ina buna tradiziun.
Il cuntegn dal pled resta bain secret, ina pitschna invista dat Guy Parmelin dentant: «Jau hai ditg che Turitg è ina bella e fitg chara citad. E ch'il Lai da Turitg è pli pitschen ch'il Lai da Genevra», di el riend.
Zug è quest onn il chantun envidà
l chantun vischin sa preschenta cun in tschegn d'egl. Ses motto sa numna «tschareschas, cripto e clischés» e duai far urden cun pregiudizis. Sco Guy Parmelin èn era ils giasts da Zug en atmosfera da festa: els han tranter auter repartì vinars da tschareschas a las aspectaturas ed als aspectaturs. «E nus avain buna luna cun els», di ina truppa da Zug.
Igl è la segunda giada ch'il Grischun vegn a sa preschentar sco chantun envidà. L'emprima giada è stada il 2004. Lura ha la delegaziun grischuna purtà concurrenza al Böögg cun l'Hom Strom ch'els han brischà sin il plaz da Sechseläuten. Ina tradiziun sumeglianta per stgatschar l'enviern oriunda da Scuol.
Era il Böögg è ornà en il senn dals da Zug: vi da sias ureglias pendan tschareschas. L' um da naiv da passa trais meters spetga sin sia fin en las flommas al Sechseläutenplatz. Sia barschada è il punct culminant da la festa da primavaira.
Pli svelt che ses chau explodescha e pli bella che la stad daventa. Il pli lung temp hai durà l'onn 2023. Quella giada èn passadas radund 57 minutas enfin a la pitra fin. Auters onns percunter aveva l'um da naiv prescha. Il 1956 è ses chau explodì suenter quatter minutas.