92% da la populaziun ha bandunà l'emna passada ses dachasa, il pli savens è quai stà il cas per ir a far cumpras. Cumpareglià cun la retschertga dal mars èn uschia puspè dapli persunas idas ord chasa (grafica 1). Bain èn damain persunas ch'avant duas emnas idas ord chasa per far cumissiuns, persuenter è la glieud ida ora pli savens per ir a spass u per far sport.
L'appell da l'Uffizi federal da sanadad da betg bandunar ses dachasa sa drizza surtut a las persunas pli veglias ch'èn periclitadas pli ferm da la malsogna covid-19. Cumpareglià cun l'ultima retschertga da Sotomo dal mars van ussa damain persunas sur 65 onns ord chasa per far cumissiuns. Avant duas emnas eran quai anc 64% dals dumandads sur 65 onns, uss anc 44%.
Malgrà quest desideri dad ir giuadora a sa muventar, mussa la retschertga era che la populaziun accepta e sa tegna vid las mesiras.
Dumber da contacts è sa reducì
Il svilup tar il dumber da contacts mussa, che l'appell da tegnair distanza cuntanscha adina pli grondas cumparts da la populaziun. Tar la retschertga dals 22 da mars aveva anc 38% da la populaziun inditgà d'avair nagins contacts pli stretgs ordaifer l'agen dachasa. L'emna avant ils 5 d'avrigl è quella cumpart creschida sin 47%.
En egl dat, ch'era persunas che tgiran per ordinari blers contacts han reducì l'emna passada il dumber da contacts (grafica 2). Uschia è il dumber da contacts tar la populaziun pli giuvna, tranter 15 e 35 onns, sa reducì en media dad 8 contacts per emna sin 5. E sur l'entira populaziun è il dumber da contacts per emna e per persuna sa reducì da 4,2 sin 3,0 contacts.
Pli gronda fidanza en manaders politics
Tar l'emprima retschertga avevan anc 63% dals dumandads inditgà dad avair gronda u fitg gronda fidanza en las autoritads politicas. Questa cumpart è creschida aifer duas emnas sin 67% (grafica 3). Fertant che la fidanza en las autoritads n'è betg grond sa midada en la Svizra tudestga, han ils manaders politics gudagnà fidanza en la Svizra latina.
Raschun per la sceptica envers ils manaders politics era surtut l'opiniun ch'il Cussegl federal haja reagì memia tard cun mesiras per franar il coronavirus e che la situaziun en ils ospitals pudess ir ord controlla.
Dapli detagls da l'emprima retschertga da Sotomo chattais qua: