Consequenzas dal corona - Memia pauc moviment, ma dapli ruaus
Las mesiras rigurusas ha consequenzas sin il mintgadi da las bleras persunas che vivan en Svizra. Cunzunt la libertad da sa mover restrenschida, sco er las stizuns ed ustarias serradas fan fastidis a la populaziun. Cunquai che las scolas èn serradas s'agraveschia la situaziun per famiglias.
A bleras persunas è il radius da sa mover vegnì restrenschì cun las mesiras extraordinarias dal Cussegl federal, plinavant ha l'Uffizi federal da sanadad BAG appellà da restar a chasa. D'in maun constatescha 43% da la populaziun ina mancanza da moviment. Da l'auter maun constateschan 35% d'avair dapli ruaus e recreaziun e 34% sentan pli fermas relaziuns en famiglia u en in partenadi.
Legenda:
Quai ch'è cotschen vegn resentì sco negativ - il blau èn effects positivs.
RTR Grafica
Il mument lavura ina maioritad da 56% dals emploiads dal tut u per part da chasa anora, quai tenor la retschertga da sotomo. A 40% n'èsi betg pussibel da lavurar a chasa. 3% faschessan gugent homeoffice, lur schefs na lubeschan però betg quai.
Tgei ei la pli gronda tema ella crisa?
Ils pli blers (48%) teman da survegnir sezs la malsogna covid-19. Sin posiziun dus è la tema da la libertad da sa mover (38%). Plinavant mussa la retschertga che «sulet» 15% ha il mument la gronda tema da perda la plazza.
Legenda:
RTR Grafica
La retschertga
Avrir la boxSerrar la box
L'institut da perscrutaziun Sotomo ha fatg la retschertga sin incumbensa da la SRG SSR. En tut han 30'460 persunas respundì las dumondas publitgadas online tar RTR, SRF, RSI, RTS e Swissinfo. Questa emprima retschertga davart la crisa da corona è vegnida fatga sur la fin d'emna dals 21 fin ils 23 da mars 2020. La quota da sbagls munta a +/- 1,1 puncts procentuals.
