L’emprima giada ha la Confederaziun percurschì il plugl l’entschatta da zercladur. Lura saja ina furniziun cun radund 50 plantinas da flurs da «callistemon» arrivada via l’Italia en Svizra. Tenor l’Uffizi federal d'agricultura èn intginas da quellas plantinas stadas infectadas, uschia ch’ils passagiers zuppads han pudì entrar en Svizra.
-
Bild 1 von 4. L'oleander ina da las flurs pertutgadas dal plugl. Bildquelle: Colourbox.
-
Bild 2 von 4. La flur rododendrons ch'è era pertutgada dal plugl. Bildquelle: Keystone.
-
Bild 3 von 4. La flur Callistemon sin quella ch'il plugl è entrà en Svizra sco passagier zuppà. Bildquelle: Pixabay.
-
Bild 4 von 4. Era il hibiscus è ina da las flurs pertutgadas. Bildquelle: Colourbox.
In animal pitschen dentant nuschaivel
Il plugl ch'è be intgins millimeters grond sa tegna ferm vid las ragischs da la flur e frainia qua tras il process da crescher da la flur, declera Jonathan Fisch da l'Uffizi federal d'agricultura. Silsuenter daventa la planta melna, avant ch’ella crappa. Cunzunt pertutgadas èn flurs sco oleanders, rododendrons, callistemons u hibiscus.
Il problem crescha
Sco reacziun haja il Servetsch federal per la protecziun da las plantas fatg in appel a la populaziun da controllar lur flurs sin tals plugls. En curt temp hajan els survegnì radund 300 annunzias. Da quellas sajan 40 stadas positivas. Durant l’appel ha il servetsch federal dentant percurschì ch’il furnitur da l’Italia importa era via la Germania en Svizra. Experts ed expertas dal servetsch sminan perquai, ch’il dumber total da plantinas da flurs infectadas da «callistemon» pudess crescher sin 150.
Appel d'agid
Tenor Jonathan Fisch saja uss impurtant da chattar spert tut ils parasits. Perquai vul ins uss render attent butias da flurs e centers d'orticultura sco er persunas ch’han avant curt cumprà talas flurs. L’Uffizi federal per agricultura restia optimistic, ch’ins vegnia bainbaud a schliar quest problem.