Tgi che vegn d’ina regiun da risico en Svizra, sto ir en quarantina. Ils chantuns èn obligads da controllar quai cun provas da controlla. Il problem è dentant che quels survegnan strusch datas da l’Uffizi federal da sanadad. Quai vul il BAG uss midar: Els sajan vidlonder da tschentar en dapli persunal per pudair furnir dapli datas. Quai ha ditg Patrick Mathys dal BAG envers Radio SRF.
Per proteger las datas saja dentant sclaus che glistas da passagiers vegnian dadas vinavant cumplettamain. Dentant ha Mathys empermess da furnir las datas pli spert als chantuns.
Las cifras creschan
Mesemna ha l'Uffizi federal per sanadad annunzià 193 novs cas da corona entaifer 24 uras, per la Svizra ed il Principadi da Liechtenstein. Mardi eran quai anc 132, il glindesdi 65 e la dumengia 110.
Il Grischun ha annunzià mesemna in nov cas. Uschia è il dumber d'infecziuns uss tar 61 e 350 persunas èn en quarantina.
