Mo pli ina cassa da malsauns. Quai vulan dus terzs da la populaziun svizra, sco quai ch'ina retschertga represchentativa da Deloitte, in'interpresa d'examinaziun e consultaziun, scriva. Pia abolir cassas da malsauns privatas a favur d'ina cassa da malsauns unitara. Cunzunt en il Tessin ed en Svizra franzosa sajan blers per quest'idea. Sa participà a la retschertga han passa 1'200 persunas da l'entira Svizra.
I n'è betg l'emprima giada ch'ina cassa da malsauns unitara è tema en Svizra. Gia quatter giadas ha la Svizra votà davart l'idea. Ma, tut ils projects correspundents n'han fin ussa betg persvas il suveran. Las partidas burgaisas èn adina s'exprimidas cleramain cunter l'idea.
PS vul preschentar schliaziun alternativa
La Partida socialdemocratica (PS) è da l'opiniun ch'il sistem existent cun var 40 cassas da malsauns privatas na saja betg effizient. Tuts stoppian la finala porscher exact ils medems servetschs, di il co-president da la PS Cédric Wermuth. Quai saja ina concurrenza che nagin chapeschia.
I dat exempels – sco l'AVS u l'assicuranza d'accidents Suva – ch'èn organisads auter e bler pli effizient.
Perquai vul la PS preschentar ina schliaziun alternativa: ina cassa publica. Questa cassa avess ina structura per l'entira Svizra, vegniss dentant administrada en las regiuns u en ils chantuns. Uschia dess quai en ils chantuns mo pli ina assicuranza da basa. Las premias vegnissan vinavant ad esser different autas da chantun tar chantun. Questa varianta gaudia tenor il SRF er dapli simpatia da vart burgaisa. Il project saja en il process da vegnir elavurads, ha la PS communitgà.