Dapli persunas ch’anc avant quatter onns investeschan en ina terza pitga. Quai demussa ina retschertga represchentativa dal servetsch da cumparegliaziun «Comparis».
Pli blers umens cun pitga 3A
Bunamain 70% da las persunas dumandadas hajan inditgà da spargnar cun ina terza pitga da 3A. Quai sajan radund 7% dapli ch’anc il 2018. La quota da dunnas ch’hajan ina terza pitga saja s’augmentà da radund 56% sin 64%; quella dals umens da radund 70% sin 76%. «Comparis» attribuescha quest trend a las rentas che vegnian pli bassas e las discussiuns davart refurmas dal provediment da vegliadetgna che na vegnian betg vinavant. Fatg part da la retschertga han passa 2’200 persunas.
Fidaivladad en la banca da chasa vegn pli pitschna
Radund la mesadad hajan ils raps da 3A sin differents contos, uschia pudessan els utilisar pli tard ils avantatgs fiscals supplementars da la retratga graduada. Er en la banca da chasa n'è la fidaivladad betg pli uschè auta. Gia 40% da las persunas interrogadas han tenor las indicaziuns in purschider digital da soluziuns da 3A u prevesan quel onn. Quai saja oravant tut tar ils giuvens popular.